Акафист преподобному Стефану Филейскому

Конда́к 1

Избра́нный чудотво́рче и преди́вный уго́дниче Христо́в, земли́ Вя́тския похвало́ и ра́дование, со умиле́нием воспева́ем труды́ и по́двиги твоя́, на ни́ве Христо́вой положе́нныя и всю зе́млю Вя́тскую плоды́ духо́вными освяти́вшия. Ты же, име́я ве́лие дерзнове́ние ко Христу́ Царю́ и Бо́гу на́шему, путево́дствуй нас на путь спасе́ния, и от вся́ких бед свобожда́й, да зове́м ти:
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

И́кос 1

А́нгели удивля́хуся житию́ твоему́, о́тче преподо́бне Стефа́не, я́ко от ю́ности ко Го́споду всем се́рдцем устреми́лся еси́, и суету́ мирску́ю возненави́дев, к моли́тве сокрове́нней и безмо́лвию усе́рдно прилежа́л еси́, сего́ ра́ди вопие́м ти:
Ра́дуйся, благочести́выя ма́тере плод благоуха́нный.
Ра́дуйся, изде́тска Го́сподем предизбра́нный.
Ра́дуйся, от ю́ности Го́спода Еди́наго всем се́рдцем возлюби́вый.
Ра́дуйся, вся кра́сная ми́ра сего́ нивочто́же вмени́вый.
Ра́дуйся, слуго́ю Госпо́дним бы́ти преднарече́нный.
Ра́дуйся, на по́двиги мона́шескаго жития́ ма́терию благослове́нный.
Ра́дуйся, от грехопаде́ний плотски́х Го́сподем всегда́ храни́мый.
Ра́дуйся, благода́тию Бо́жиею укрепля́емый и согрева́емый.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 2

Ви́дя губи́тельную суету́ ми́ра сего́, преподо́бне о́тче Стефа́не, дости́гнути пусты́нней и́ночестей оби́тели в ю́ных ле́тех всем се́рдцем возжела́л еси́, ища́ уедине́ния и безмо́лвия, иде́же моли́тву непреста́нную творя́, воспое́ши ко Го́споду со умиле́нием и ра́достию: Аллилу́ия.

И́кос 2

Ра́зума духо́внаго от ю́ности испо́лнился еси́, преподо́бне о́тче Стефа́не, и наста́вника духоно́снаго ища́, по́двиг стра́нствия по оби́телем земли́ Ру́сския со тща́нием и усе́рдием прия́л еси́, безмо́лвно терпя́ глад, хлад, тесноту́ и напа́сти от люде́й немилосе́рдных. Моли́тву сокрове́нную ко Го́споду излива́я и благода́тию Его́ укрепля́емь, те́сным путе́м ко спасе́нию шел еси́, преподо́бне. Сего́ ра́ди и мы, взира́я на терпе́ние и смире́ние твое́ в стра́нствии сем, вопие́м ти:
Ра́дуйся, во́лю свою́ отсека́я, еди́ну во́лю Бо́жию иска́л еси́.
Ра́дуйся, преда́тися в послуша́ние святы́м отце́м возжела́л еси́.
Ра́дуйся, и́го Христо́во усе́рдно поне́сл еси́.
Ра́дуйся, путь у́зкий и приско́рбный любве́ ра́ди Христо́вой избра́л еси́.
Ра́дуйся, плоды́ му́дрости духо́вней во оби́телех, я́ко пчела́ усе́рдно собира́л еси́.
Ра́дуйся, моли́тву Иису́сову возлюби́л еси́.
Ра́дуйся, моли́твою, а́ки некта́ром благоуха́нным, ду́шу свою́ пита́л еси́.
Ра́дуйся, творя́ моли́тву непреста́нную, се́рдце свое́ неизрече́нною ра́достию напо́лнил еси́.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 3

Си́лы небе́сныя укрепля́ху тя, преподо́бне, егда́ после́дуя благослове́нию ста́рца Ни́ла, в зе́млю Вя́тскую возврати́лся еси́, и та́мо близ ве́си, иде́же роди́лся еси́, над Филе́йкой реко́ю, в ме́сте пусты́ннем и безлю́днем пеще́ру себе́ ископа́л еси́, иде́же моли́тве усе́рдней и сле́зней во мно́гая дни предава́лся еси́, взыва́я чи́стым се́рдцем ко Го́споду: Аллилу́ия.

И́кос 3

Име́я ре́вность Боже́ственную и ве́лию любо́вь ко Го́споду, вся́кую молву́ ми́ра сего́ возненави́дел еси́, преподо́бне о́тче Стефа́не. Безмо́лвие возлюби́в и отше́льническое житие́ избра́в, в ве́си свое́й я́ко стра́нен и безу́мен был еси́, то́кмо ма́терию на по́двиги мона́шеския благословля́емь. Сего́ ра́ди, поуча́яся смире́нию твоему́, вопие́м ти:
Ра́дуйся, преподо́бным ки́ево-пече́рским в житии́ свое́м поревнова́вый.
Ра́дуйся, в пеще́ру убо́гую всели́тися возжела́вый.
Ра́дуйся, слеза́ми мно́гими пеще́ру свою́ ороси́вый.
Ра́дуйся, вери́ги желе́зныя на себе́ возложи́вый.
Ра́дуйся, искуше́ния и ско́рби Го́спода ра́ди ра́достно принима́вый.
Ра́дуйся, укори́зны бли́жних кро́тко терпе́вый.
Ра́дуйся, Бо́гу себе́ преда́вый.
Ра́дуйся, селе́ния Филе́йская и всю зе́млю Вя́тскую моли́твою свое́ю освяти́вый.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 4

Бу́ря искуше́ний враго́м ро́да челове́ча мно́гажды воздвиза́ема бя́ше на ду́шу твою́, преподо́бне, егда́ в пусты́ннем безмо́лвии моли́тву сокрове́нную твори́л еси́. Но ве́рою кре́пкою и упова́нием на Го́спода, слеза́ми сокруше́нными и покая́нием серде́чным я́рость бу́ри диа́вольския укроща́л еси́, вопия́ из глубины́ серде́чныя ко Го́споду: Аллилу́ия.

И́кос 4

Слы́ша сло́во Го́спода, чрез проро́ка глаго́люща: «Призови́ Мя в день ско́рби твоея́, и изму́ тя», — ты же, подви́жниче усе́рдный, в ско́рбех свои́х прибега́л еси́ ко Го́споду, прося́ умно́жити и укрепи́ти ве́ру твою́. Те́мже мо́лимся ти: укрепи́ ве́ру и в нас немощны́х, зову́щих ти та́ко:
Ра́дуйся, нищету́ духо́вную, я́ко би́сер безце́нный взыска́вый.
Ра́дуйся, пла́кавший непреста́нно о гресе́х свои́х ко Го́споду.
Ра́дуйся, кро́тостию свое́ю любо́вь Госпо́дню сниска́вый.
Ра́дуйся, а́лчущий и жа́ждущий пра́вды небе́сней.
Ра́дуйся, ми́лостию свое́ю ни́щих и убо́гих пита́вый.
Ра́дуйся, чистоту́ серде́чную слеза́ми умиле́нными стяжа́вый.
Ра́дуйся, мир и ра́дость духо́вную ми́ру дарова́вый.
Ра́дуйся, поруга́ния и злосло́вие Го́спода ра́ди терпе́вый.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 5

Боже́ственный свет осия́ се́рдце твое́, преподо́бне, егда́ узре́л еси́ в нощи́, ду́шу и́нока к небесе́ А́нгелы возноси́му. Зря сие́ зна́мение Госпо́дне, оби́тель и́ноческую близ Филе́йския ве́си основа́ти возжела́л еси́, и о сем усе́рдно Го́спода моли́л еси́, взыва́я Ему́: Аллилу́ия.

И́кос 5

Ви́дя стремле́ние се́рдца твоего́ оби́тель и́ноческую созда́ти, Промысли́тель Го́сподь помышле́ние в ду́шу твою́ влага́ет, па́ки оби́тели и́ноческия посети́ти, и та́мо му́дростию духо́вною напита́тися, и житие́ мона́шеское соверше́нне позна́ти. Ты же, повину́яся влече́нию се́рдца твоего́, стра́нствие сие́ соверши́л еси́, ско́рби ве́лия, мраз, глад и боле́зни терпя́, я́ко и́стинный раб и послу́шник Христо́в. Те́мже, поуча́яся терпе́нию твоему́, зове́м ти та́ко:
Ра́дуйся, любо́вию ко Го́споду се́рдце свое́ уязви́вый.
Ра́дуйся, терпе́нием страда́ний свято́му Симео́ну, Христа́ ра́ди юро́дивому уподо́бивыйся.
Ра́дуйся, оби́тель Саро́вскую в стра́нствии свое́м посети́вый.
Ра́дуйся, послуша́ния разли́чныя в ней исполня́вый.
Ра́дуйся, святы́м ки́ево-пече́рским поклони́выйся.
Ра́дуйся, и́ноками Гли́нския пусты́ни уте́шенный.
Ра́дуйся, святу́ю го́ру Афо́нскую, я́ко вене́ц стра́нствия своего́ име́вый.
Ра́дуйся, небе́сных оби́телей дости́гнути по́двигом мона́шеским пла́менне вожделе́вый.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 6

Пропове́дником нело́жным уче́ния Христо́ва всем житие́м твои́м был еси́, преподо́бне о́тче Стефа́не, я́ко не стяжа́л еси́ сокро́вищ земны́х и тле́нных, а то́кмо к Бо́гу всем се́рдцем устремля́лся еси́, и Ему́ еди́ному воспева́л еси́ со слеза́ми: Аллилу́ия.

И́кос 6

Возсия́л еси́ я́ко до́брый па́стырь в земли́ Вя́тстей, преподо́бне о́тче Стефа́не, неуста́нно му́дростию духо́вною, в Свяще́нном Писа́нии и уче́нии святы́х оте́ц сокрове́нною, лю́ди правосла́вныя назида́я и чад их люби́ти Сло́во Бо́жие наставля́я. Научи́ и нас и́стину Христо́ву возлюби́ти, вся же уче́ния душевре́дная, зе́млю Ру́сскую наводни́вшия, возненави́дети. Сего́ ра́ди зове́м ти:
Ра́дуйся, в Зако́не Бо́жием неуста́нно ходи́вый.
Ра́дуйся, Свяще́нное Писа́ние всем се́рдцем возлюби́вый.
Ра́дуйся, поуче́ния и наставле́ния из книг свяще́нных неуста́нно собира́вый.
Ра́дуйся, прему́дростию святы́х отце́в ду́шу свою́ согрева́вый.
Ра́дуйся, духо́вному просвеще́нию наро́да усе́рдно послужи́вый.
Ра́дуйся, кни́ги духо́вныя мно́гим безме́здно раздава́вый.
Ра́дуйся, дете́й филе́йских люби́мый учи́телю.
Ра́дуйся, о целому́дрии и добронра́вии их усе́рдный попечи́телю.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 7

Хотя́ в уедине́нии и безмо́лвии подвиза́тися, преподо́бне, и написа́нию книг душеполе́зных себе́ посвяти́ти, не дерза́л еси́ чин а́нгельский восприя́ти. Но благослове́ние архипа́стыря исполня́я, в мона́шество во и́мя святи́теля Стефа́на Великопе́рмскаго постри́жен был еси́, со благогове́нием воспева́я Христу́ Бо́гу а́нгельскую песнь: Аллилу́ия.

И́кос 7

Но́выя благода́ти испо́лнися душа́ твоя́, преподо́бне, егда́ по приня́тии чи́на а́нгельскаго, в пусты́ню свою́ возврати́лся еси́, и та́мо в убо́зей ке́лии свое́й, труды́ мно́гими Го́спода прославля́л еси́, взыва́я к Нему́ со слеза́ми: «Го́споди, Го́споди, пощади́ раба́ Своего́!» Помози́ у́бо и нам немощны́м, жите́йскою го́рдостию испо́лненным, покая́ние и страх Бо́жий в сердца́ на́ша стяжа́ти, те́мже вопие́м ти:
Ра́дуйся, па́мять сме́ртную всегда́ име́вый.
Ра́дуйся, небе́сное превы́ше земна́го возлюби́вый.
Ра́дуйся, а́ки кро́ткий а́гнец вся терпе́вый.
Ра́дуйся, огне́м моли́твы стре́лы вра́жия попали́вый.
Ра́дуйся, во́лю Госпо́дню испо́лнивый.
Ра́дуйся, на земли́ живя́, ра́дости духо́вныя сподо́бивыйся.
Ра́дуйся, земны́й а́нгеле и небе́сный челове́че.
Ра́дуйся, предста́телю о нас пред Го́сподем непосты́дный.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 8

Стра́ннаго виде́ния сподо́бился еси́, блаже́нне о́тче, егда́ во сне мно́жество птиц че́рных нападо́ша на тя, погуби́ти тя хотя́ще. Воспряну́в от сна сего́ ди́внаго, премно́гия ра́ны на те́ле свое́м узре́л еси́, и нападе́ние диа́вольское в сем уразуме́в, воспе́л еси́ Го́сподеви, храня́щему раба́ Своего́ от зло́бы и ко́зней вра́жиих, благода́рственную песнь: Аллилу́ия.

И́кос 8

Вся испыта́ния и ско́рби жития́ по́стническаго претерпе́вый, восхоте́л еси́, о́тче, храм на ме́сте по́двига твоего́ созда́ти и скит мона́шеский та́мо устро́ити. Благослове́ние архипа́стыря испроси́в, к труду́ се́му приступи́л еси́. И бра́тию, и́щущую безмо́лвия, в пу́стынь свою́ собра́л еси́, с оте́ческой любовью́ тех моли́тве сокрове́нней поуча́я. Помози́ у́бо и нам, недосто́йным ча́дом твои́м, непреста́нную моли́тву ко Го́споду стяжа́ти и небе́сное па́че земна́го возлюби́ти, да зове́м ти:
Ра́дуйся, земли́ Вя́тския па́стырю до́брый.
Ра́дуйся, наста́вниче наш кро́ткий и богому́дрый.
Ра́дуйся, творе́нием моли́твы Иису́совой чистоту́ серде́чную стяжа́ти науча́ющий.
Ра́дуйся, к усе́рдней моли́тве нас призыва́ющий.
Ра́дуйся, благотвори́ти ни́щим и убо́гим приме́ром жития́ своего́ нас подвиза́еши.
Ра́дуйся, поуча́тися в чте́нии Сло́ва Бо́жия всех призыва́еши.
Ра́дуйся, приме́р покая́ния нам показу́еши.
Ра́дуйся, о́браз послуша́ния нам явля́еши.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 9

Всем приходя́щим к тебе́, преподо́бне, я́ко оте́ц чадолюби́вый был еси́, на путь спасе́ния их наставля́я и уны́ние бесо́вское отгоня́я. Ти́и же ра́дости духо́вныя исполня́яся, благода́рне воспева́ху ко Го́споду: Аллилу́ия.

И́кос 9

Вети́и суему́дреннии ве́ка сего́ не возмо́гут уразуме́ти сострада́ния твоего́ к па́дшым челове́ком, ихже сло́вом му́дрым и благода́тным от грехо́вныя жи́зни отвраща́л еси́. Помози́ у́бо и нам, па́стырю до́брый, уны́ния и отча́яния бесо́вскаго избе́гнути и ду́ши своя́ от сете́й вра́жиих изба́вити, воспева́ющим ти:
Ра́дуйся, па́дших в бе́здну грехо́вную от жи́зни па́губныя отвраща́вый.
Ра́дуйся, все́ю душе́ю о них скорбе́вый.
Ра́дуйся, любо́вию се́рдца своего́ хла́дныя их ду́ши согрева́вый.
Ра́дуйся, моли́тву сле́зную о них ко Го́споду возноси́вый.
Ра́дуйся, в беда́х и обстоя́ниих ско́рый помо́щниче.
Ра́дуйся, милосе́рдием свои́м Го́спода просла́вивый.
Ра́дуйся, плоды́ духо́вныя: любо́вь, мир и долготерпе́ние — стяжа́вый.
Ра́дуйся, приме́р смире́ния, кро́тости и воздержа́ния подава́вый.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 10

Всем спасе́ния душе́внаго и́щущим, был еси́ пред Го́сподем хода́тай усе́рдный, о́тче наш Стефа́не. Не оста́ви и нас, в суете́ ми́ра сего́ утопа́ющих. Помози́ нам моли́твами твои́ми отврати́тися от прельще́ний па́губных и грехо́внаго безчу́вствия, да очи́стившеся от ти́ны страсте́й, из глубины́ душе́вныя воспои́м спаса́ющему нас Бо́гу: Аллилу́ия.

И́кос 10

Стено́ю моли́тв твои́х огражда́л еси́, о́тче, чад твои́х от па́губных искуше́ний и паде́ний грехо́вных. Сего́ ра́ди оби́тель во и́мя защи́тника и моли́твенника земли́ Ру́сския свята́го благове́рнаго кня́зя Алекса́ндра Не́вскаго воздви́гнути возжела́л еси́, дабы́ оби́тель сия́ но́вым подви́жником благоче́стия яви́лася еси́ неруши́мою стено́ю, кре́постию ду́ха Правосла́вия и учи́лищем благоче́стия. Научи́ и нас, о́тче, смире́нием отража́ти вся́кия душетле́нныя искуше́ния диа́вольския, да с любо́вию призыва́ем тя:
Ра́дуйся, я́ко засту́пник земли́ Вя́тския был еси́.
Ра́дуйся, мече́м духо́вным вооружи́лся еси́.
Ра́дуйся, в броню́ пра́вды Христо́вой обле́клся еси́.
Ра́дуйся, щито́м ве́ры нападе́ния вра́жия отража́л еси́.
Ра́дуйся, проти́ву ко́зней диа́вольских ору́жием моли́твы противоста́л еси́.
Ра́дуйся, моли́твою Иису́совою в бе́гство полки́ бесо́вския обраща́л еси́.
Ра́дуйся, мно́гих во́инов духо́вных воспита́л еси́.
Ра́дуйся, упова́ти на Го́спода их призыва́л еси́.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 11

Пе́ние всеумиле́нное Бо́гу приноси́л еси́, о́тче преподо́бне, и сим пе́нием преди́вным исполня́шеся храм оби́тели твоея́, иде́же и́ноцы моли́твы усе́рдныя Го́сподеви приноша́ху, воспева́я Ему́: Аллилу́ия.

И́кос 11

Све́та небе́снаго испо́лнися ке́ллия твоя́, преподо́бне Стефа́не, егда́ прови́дя бли́зкую кончи́ну твою́, вели́кий а́нгельский о́браз восприя́л еси́ и ежеде́нным причаще́нием Святы́х Христо́вых Та́ин ко преселе́нию во оби́тели небе́сныя предугото́вился еси́. Сего́ ра́ди зове́м ти:
Ра́дуйся, мно́гия ско́рби в житии́ твое́м претерпе́вый.
Ра́дуйся, боле́знь тя́жкую пред кончи́ною свое́ю безро́потно понесы́й.
Ра́дуйся, терпе́нием муче́ний ду́шу свою́, я́ко зла́то в горни́ле, очи́стивый.
Ра́дуйся, за боле́знь си́ю Го́спода благодари́вый.
Ра́дуйся, кончи́ну свою́ бра́тии свое́й предсказа́вый.
Ра́дуйся, в день Успе́ния Пресвяты́я Богоро́дицы в ру́це Го́спода ду́шу свою́ преда́вый.
Ра́дуйся, бра́тиею оби́тели твоея́ и все́ю Вя́тскою земле́ю опла́канный.
Ра́дуйся, близ алтаря́ Успе́нския це́ркви во оби́тели твое́й благогове́йно погребе́нный.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 12

Благода́ть и ве́лие твое́ дерзнове́ние пред Бо́гом веду́ще, приле́жно мо́лим тя, о́тче наш преди́вный: проле́й те́плую моли́тву о нас ко Го́споду, да да́рует нам ве́ру нелицеме́рную, дух покая́ния и смире́ния, да воспое́м Ему́ со умиле́нием: Аллилу́ия.

И́кос 12

Пою́ще лю́дие земли́ Вя́тския у гро́ба твоего́ побе́дную песнь, ю́же в житии́ свое́м па́че всех воспева́л еси́, о́тче: «С на́ми Бог, разуме́йте язы́цы и покоря́йтеся, я́ко с на́ми Бог!» – умиле́ния и ра́дости испо́лнишася и твое́ неуста́нное хода́тайство о них пред Го́сподем позна́ша. Те́мже мо́лим тя, преподо́бне о́тче, не забу́ди и нас, недосто́йных чад твои́х, но всегда́ пребыва́й с на́ми, да твои́м заступле́нием огражда́еми и от всех зол избавля́еми, вопие́м ти:
Ра́дуйся, добропобе́дный во́ине Царя́ Небе́снаго, Его́же по́лчища бесо́вския трепе́щут.
Ра́дуйся, па́стырю благи́й, зло́бу диа́вольскую нивочто́же вмени́вый.
Ра́дуйся, моли́твенников похвало́, мрак уны́ния от нас отгна́вый.
Ра́дуйся, наста́вниче заблу́ждших, вся ло́жная и душевре́дная уче́ния посрами́вый.
Ра́дуйся, мона́шествующих сла́во, тобо́ю бо ве́ра правосла́вная в сердца́х на́ших утвержда́ется.
Ра́дуйся, и́стинный дру́же Христо́в, тобо́ю бо пре́лесть ерети́ческая сокруша́ется.
Ра́дуйся, насле́дниче жи́зни ве́чныя, нас, в ми́ре сем стра́нствующих, ко спасе́нию наста́вивый.
Ра́дуйся, свети́льниче Вя́тския земли́, ты бо в моли́твах с на́ми непреста́нно пребыва́еши.
Ра́дуйся, преподо́бне о́тче наш Стефа́не, за зе́млю Вя́тскую усе́рдный моли́твенниче.

Конда́к 13

О, пресла́вный уго́дниче, преподо́бне о́тче Стефа́не! Приими́ сие́ ма́лое моле́ние на́ше, с любо́вию тебе́ возноси́мое, и да́руй нам благоприя́тным хода́тайством твои́м изба́витися от гее́нны о́гненныя и ве́чных мук, сподо́би нас Ца́рствия Небе́снаго и блаже́нства святы́х, да воспое́м с тобо́ю Сладча́йшему Христу́ Бо́гу на́шему: Аллилу́ия.

Это́т конда́к чита́ется три́жды, зате́м 1-й и́кос и 1-й конда́к.

Моли́тва

О, свяще́нная главо́, преподо́бне о́тче наш Стефа́не! Ны́не предстоя́й пред престо́лом Святы́я Тро́ицы, не забу́ди нас, чад твои́х, вознеси́ моли́твы своя́ о нас, да испро́сиши нам у Бо́га грехо́в проще́ние, страсте́й оставле́ние, се́рдца очище́ние, духо́вных оче́с просветле́ние, и в житии́ сем вся поле́зная и дово́льная: це́рквам благостоя́ние, градо́м укрепле́ние, наро́дом умире́ние, возду́хов благорастворе́ние, немощны́м исцеле́ние, младе́нцем воспита́ние, ю́ным наставле́ние, ста́рым поддержа́ние и всем вся благопотре́бная.

О, свя́тче Бо́жий, подава́й нам о́браз жития́ богоуго́днаго и научи́ оставля́ти бла́га вре́менная ве́чных благ ра́ди. Ны́не моли́ся о нас ко Го́споду, да возмо́жем безпреткнове́нно вни́ти в Ца́рствие Небе́сное и та́мо воспева́ти со все́ми святы́ми Живонача́льную Тро́ицу во ве́ки веко́в. Ами́нь.

Тропа́рь, глас 4

И́же отце́м в доброде́телех подража́телем быв, / вся кра́сная ми́ра сего́ оста́вил еси́, / в уедине́нии и безмо́лвии словесы́ Госпо́дни пита́лся еси́, / тем и други́х науча́л еси́, приходя́щих к тебе́. / Нестяжа́нием обогати́выйся и кро́тостию возвы́сивыйся, / научи́ и нас подража́ти тебе́ // и бу́ди моли́твенник о нас гре́шных, преподо́бне о́тче Стефа́не.

Конда́к, глас 8

От ю́ности Христа́ возжела́вый, / прия́л ecи́ по́двиг и́ноческий, / преподо́бнаго Три́фона дух возиме́л еси́ / и основа́телем оби́тели был еси́, / собра́л та́мо мно́жество ученико́в, // с ни́ми моли́ Христа́ Бо́га спасти́ся душа́м на́шим.

Велича́ние

Ублажа́ем тя, / преподо́бне о́тче Стефа́не, / и чтим святу́ю па́мять твою́, / наста́вниче мона́хов // и собесе́дниче А́нгелов.

Источник: «Акафист преподобному Стефану Филейскому, Вятскому чудотворцу». — Киров: ООО «Лобань», 2021. — 36 с.

Как нас найти

610000, г. Киров, ул. Горбачева, дом 4.

От остановки Ж/д вокзал можно доехать автобусом № 3, 37, 67 и троллейбусом № 4 до остановки Трифонов монастырь.